Da DUMI~DUMI: Barau Ya Gargadi Afirka ta Kudu Kan Hare-Haren Xenophobia, Ya Nemi Gaggawar Daukar Mataki

Mataimakin Shugaban Majalisar Dattawa, Sanata Barau I. Jibrin, ya bukaci gwamnatin Afirka ta Kudu da ta gaggauta daukar matakan da suka dace domin kawo karshen hare-haren da ake kai wa ’yan Najeriya da sauran baki mazauna kasar. Ya yi gargadin cewa ci gaba da irin wadannan hare-hare na iya janyo daukar matakan shari’a a matakin kasa da kasa.

Sanata Barau ya yi wannan kira ne a zaman Majalisar Dattawa na ranar Talata, bayan an shafe lokaci ana muhawara kan rahotannin cin zarafi da kashe-kashen da ake zargin ana yi wa ’yan Najeriya da sauran ’yan kasashen waje a Afirka ta Kudu. Ya jaddada cewa wajibi ne gwamnatin kasar ta tabbatar da kariya ga rayuka da dukiyoyin baki da ke zaune a cikinta.

A yayin muhawarar, wasu sanatoci ciki har da Sanata Adams Oshiomhole sun bukaci a dauki tsauraran matakai kan lamarin, inda aka ba da shawarar a rike ribar wasu kamfanonin Afirka ta Kudu da ke aiki a Najeriya domin tallafa wa wadanda hare-haren suka shafa.

Sai dai Barau ya yi kira da a yi taka-tsantsan, yana mai tunatar da majalisar cewa an riga an dora wa Kwamitin Harkokin Waje na Majalisar Dattawa alhakin bincike kan lamarin tare da gabatar da shawarwarin da suka dace. Ya ce idan kasashe suka fara garzayawa kotunan kasa da kasa domin neman adalci ga ’yan kasarsu da aka kashe ko aka jikkata a wata kasa, hakan zai jawo hankalin duniya baki daya.

Har ila yau, ya tuna cewa Afirka ta Kudu ta taba mara wa wani shari’a baya a Kotun Duniya kan batun Falasdinu, yana mai cewa ya kamata gwamnatin kasar ta magance matsalar cikin gida kafin ta rikide zuwa babbar matsalar diflomasiyya da shari’a. Ya kuma yaba wa kokarin gwamnatin tarayya na amfani da hanyoyin diflomasiyya wajen shawo kan lamarin, tare da umartar Kwamitin Harkokin Waje da ya gabatar da rahotonsa cikin makonni biyu domin ci gaba da tattaunawa a majalisar.