Sojoji Sun Tarwatsa Sansanonin ‘Yan Bindiga a Bauchi, tare da ceto Mutane da Kwato Makamai

Rundunar sojoji ta Brigade 33 ƙarƙashin Operation WUTAN DAJI ta samu gagarumar nasara bayan gudanar da wani samame na kawar da ‘yan bindiga a dajin Kumbodoro da ƙauyen Kumbodoro a Jihar Bauchi.

A cewar wata sanarwa da aka wallafa a shafin Facebook na rundunar sojin Najeriya, farmakin ya yi wa ‘yan bindigar da ke addabar yankin babbar illa.

Rahoton ya bayyana cewa sojojin sun lalata maboyar ‘yan bindiga da dama, ciki har da sansanonin Azuge da ke cikin dajin Kumbodoro. Da taimakon rundunar sama, an kashe wasu daga cikin ‘yan bindigar tare da rusa muhimman sansanoninsu, lamarin da ya rage musu ƙarfin kai hare-hare kan jama’a.

A yayin wannan aiki, an ceto mutane takwas da aka yi garkuwa da su.

Binciken da aka gudanar a wuraren maboyar ‘yan bindigar ya kai ga gano tare da kwato makamai da kayayyaki da dama. Daga cikin abubuwan da aka kwato akwai bindigogi guda huɗu na skeletal, bindigogin gargajiya guda huɗu (dane guns), mujallar bindigar FN guda ɗaya da mujallar AK-47 guda ɗaya, tare da na’urorin sadarwa da sauran kayan aiki.

Sauran kayayyakin da aka samu sun haɗa da takalma guda biyu, huluna uku, power bank ɗaya, na’urar StarTimes guda ɗaya, QJC meta links, wuka mai kaifi (jackknife), wayoyin hannu guda shida, kibiyoyi, caja na rediyo, katunan ATM na OPAY, hotuna, katin shaida, kayan sanye na jami’an tsaro da kuma sarƙoƙin kafa.

A wani ɓangaren kuma, sojojin da ke aiki a Duguri bisa sahihan bayanan sirri sun kwato shanu guda 36 a ƙauyen Mushen Kura tare da haɗin gwiwar ‘yan sa-kai. Ana zargin shanun sun kasance na ‘yan bindiga da suka tsere sakamakon matsin lambar sojoji.

Ana ci gaba da ƙoƙarin gano masu shanun domin mayar musu da su.

Rundunar sojin Najeriya ta jaddada ƙudirin ta na dawo da zaman lafiya da tsaro a faɗin ƙasa, tare da alƙawarin ci gaba da ƙarfafa ayyukan leƙen asiri da haɗin gwiwa domin kawar da ‘yan bindiga da sauran masu aikata laifuka.