2027: Allah da Jama'ata Ne Suka Ba Ni Tikitin APC, Ba Na Cikin Masu Gata a Gwamnatin Tinubu

Sanata mai wakiltar Borno ta Kudu a Majalisar Dattawa, Ali Ndume, ya bayyana cewa nasarorin da yake samu a zabuka tsawon shekaru sun samo asali ne daga taimakon Allah, goyon bayan al’ummarsa da kuma wasu jagororin siyasa, ba wai saboda yana daga cikin wadanda ke samun gata a gwamnatin Shugaba Bola Ahmed Tinubu ba.

Ndume ya bayyana hakan ne yayin wata hira da ya yi a shirin Sunday Politics na gidan talabijin na Channels TV, inda ya ce amincewar da jama'arsa ke da ita a kansa da kuma jam'iyyar APC ce ta kasance ginshikin nasarorinsa a siyasa.

Sanatan ya ce a halin yanzu yana shirye-shiryen sake neman amincewar al'ummarsa a karo na bakwai a zabuka, bayan ya shafe wa'adin mulki biyu a Majalisar Wakilai da kuma wa'adi hudu a Majalisar Dattawa.

A cewarsa, duk da cewa ba ya cikin wadanda ake ganin suna da kusanci ko gata a cikin gwamnatin tarayya ta yanzu, hakan bai hana jama'arsa ci gaba da ba shi goyon baya ba.

“Allah ne ya ba ni tikiti, sannan jama'ata suka amince da ni. Wannan ne ya sa nake ci gaba da samun nasara a zabuka. Ba na cikin wadanda ake wa kallon masu gata a gwamnatin Shugaba Tinubu,” in ji Ndume.

Sanatan ya jaddada cewa dangantakarsa da al'ummarsa ce ta ba shi damar ci gaba da wakiltarsu tsawon lokaci, yana mai cewa siyasa ta gaskiya tana bukatar kusanci da jama'a da kuma cika alkawuran da aka dauka a kansu.

Kalaman Ndume na zuwa ne a daidai lokacin da ake ci gaba da tattaunawa kan shirye-shiryen siyasa gabanin babban zaben shekarar 2027, inda manyan 'yan siyasa ke bayyana matsayinsu kan makomar siyasar kasar nan.

Masu sa ido kan harkokin siyasa na ganin cewa furucin Sanata Ndume na nuna yadda yake kokarin tabbatar da cewa karfinsa na siyasa ya samo asali ne daga tushen jama'a, ba daga goyon bayan masu iko a matakin kasa ba.