Majalisar Dattawa Ta Bayyana Dalilin Cire Abuja Daga Tsarin Kafa ’Yan Sandan Jihohi

Abuja, Juma’a: Majalisar Dattawan Najeriya ta bayyana cewa an cire Babban Birnin Tarayya (FCT), Abuja, daga cikin tsarin kafa ’yan sandan jihohi da aka gabatar domin yi wa Kundin Tsarin Mulkin Najeriya gyara.

Majalisar ta ce dalilin cire Abuja daga tsarin shi ne kasancewarsa ba jiha ba, domin ba shi da gwamna ko Majalisar Dokokin Jiha kamar sauran jihohin ƙasar.

A cewar Majalisar Dattawa, Babban Birnin Tarayya Abuja yana ci gaba da kasancewa ƙarƙashin kulawa kai tsaye ta Gwamnatin Tarayya, don haka ba zai iya kasancewa cikin tsarin ’yan sandan jihohi da aka tanada domin jihohin Najeriya ba.

Shugaban Kwamitin Majalisar Dattawa kan Harkokin Yaɗa Labarai da Wayar da Kai, Sanata Yemi Adaramodu, ne ya bayyana hakan a ranar Juma’a yayin da yake amsa tambayoyin manema labarai kan dalilin da ya sa ba a haɗa Abuja cikin tsarin kundin tsarin mulkin da ya shafi kafa ’yan sandan jihohi ba.

Ya ce tsarin da ake gabatarwa ya shafi jihohin Najeriya ne, yayin da Abuja ke da matsayi na musamman a ƙarƙashin Gwamnatin Tarayya.

Matakin na Majalisar Dattawa na zuwa ne yayin da ake ci gaba da tattaunawa kan yiwuwar kafa ’yan sandan jihohi a Najeriya, matakin da masu ruwa da tsaki ke ganin zai iya taimakawa wajen inganta tsaron al’umma da magance matsalolin rashin tsaro a matakin jihohi.