‘Yan Sandan Bauchi Sun Kama Wanda Ake Zargi da Sace da Kashe Yaro Dan Shekara 4

Daga Orbit News

Rundunar ‘Yan Sandan Jihar Bauchi ta kama wani matashi mai shekaru 20, Rabiu Safiyanu, bisa zargin sacewa da kuma kashe wani yaro dan shekara hudu a jihar.

A cikin wata sanarwa da jami’in hulda da jama’a na rundunar, SP Nafiu Habib, ya fitar, ya ce jami’an ‘yan sanda na ofishin ‘C’ Division sun samu nasarar kama wanda ake zargin ne bayan samun rahoton batan yaro.

Mahaifin yaron, Salisu Yunusa na unguwar Nasarawa Madina a Bauchi, ya kai rahoto a ranar 21 ga Maris cewa dansa, Yunusa Salisu, ya bace tun ranar 18 ga Maris da misalin karfe 9:30 na safe. Daga bisani ya ce ya samu kira daga wata lamba da ba a sani ba, inda aka bukaci ya biya kudin fansa na naira 500,000. Rahotanni sun ce iyalan sun biya naira 100,000, amma ba a sako yaron ba.

Binciken ‘yan sanda ya kai ga kama Rabiu Safiyanu, wanda aka bayyana a matsayin abokin kanin mahaifin yaron, kuma yana da damar shiga gidan ba tare da wata tangarda ba.

Yayin bincike, wanda ake zargin ya amsa laifin cewa shi ne ya sace yaron, ya shake shi har ya mutu, sannan ya jefar da gawarsa a yankin Warinje Hills kafin ya ci gaba da neman kudin fansa daga iyalan.

‘Yan sanda sun ce sun gano gawar yaron a cikin wani yanayi na lalacewa, tare da alamun shakewa a jikinsa. Haka kuma an gano igiya da ake zargin an yi amfani da ita wajen aikata laifin.

Jami’in kula da asibitin ‘yan sanda ya tabbatar da mutuwar yaron, inda aka dauki bayanan gawar kafin a mika ta ga iyalansa domin binne shi bisa ka’idojin lafiyar jama’a.

Kwamishinan ‘Yan Sandan Jihar, CP Sani-Omolori Aliyu, ya umurci Sashen Binciken Manyan Laifuka (SCID) da su karbi shari’ar domin zurfafa bincike tare da tabbatar da an gurfanar da wanda ake zargin a gaban kuliya.

Ya kuma bukaci al’umma da su kasance masu lura da abubuwan da ke faruwa a muhallinsu tare da sanar da jami’an tsaro duk wani abu da ya zame musu abin zargi.

A halin yanzu, wanda ake zargin yana hannun ‘yan sanda yayin da ake ci gaba da bincike.