Mulkin Tinubu: ‘Yan Najeriya na kuka kan tsadar rayuwa da manufofin gwamnati

A daidai lokacin da ‘yan Najeriya ke fuskantar matsin tattalin arziki, wasu na ci gaba da bayyana damuwarsu kan yadda ake tafiyar da mulki a ƙarƙashin shugabancin Bola Ahmed Tinubu. Rahotanni daga sassa daban-daban na ƙasar sun nuna cewa mutane da dama na ganin manufofin gwamnati ba su mayar da hankali kan jin ƙai da tallafawa talakawa ba.

Masu sharhi na nuni da cewa hauhawar farashin kayayyaki, musamman man fetur, ya zama abin damuwa ga jama’a. A cewarsu, a halin yanzu sai mutum ya kashe kuɗi mai yawa kafin samun isasshen mai, lamarin da ke ƙara tsananta wahalar rayuwa ga al’umma.

Haka kuma, ana zargin cewa darajar Naira ta ragu matuƙa, abin da ya ƙara jefa tattalin arzikin ƙasa cikin ƙalubale. Duk da cewa matsalar tsadar rayuwa na faruwa a duniya baki ɗaya, wasu na ganin ya kamata gwamnati ta ɗauki matakan rage radadin da jama’a ke ciki.

A ƙasashe da dama, ciki har da United Kingdom, gwamnatoci na ƙoƙarin fito da tsare-tsaren tallafi musamman a bangaren makamashi domin rage wa al’umma nauyi. Sai dai masu suka na cewa irin waɗannan matakai ba su bayyana sosai a Najeriya ba.

Bugu da ƙari, ana ci gaba da tattara kuɗaɗen shiga ta hanyar haraji da kudin fito (custom duties), amma wasu na tambayar yadda ake amfani da waɗannan kuɗaɗe, inda suke zargin cewa ba a ganin tasirin su a ayyukan raya ƙasa.

Masu lura da al’amura sun ce ‘yan Najeriya na kallon yadda abubuwa ke tafiya, tare da fatan samun sauyi mai anfani a nan gaba. Duk da ƙalubalen, jama’a na ci gaba da addu’ar samun sauƙi da ingantuwar rayuwa a ƙasar.