Fargaba a Rivers Bayan Harin ‘Yan Bindiga Kan Ayarin Rotimi Amaechi

Wasu ‘yan bindiga da ake zargin ‘yan daba ne na siyasa sun kai hari a ranar Juma’a kan ayarin tsohon gwamnan Jihar Rivers kuma tsohon Ministan Sufuri, Rotimi Amaechi, a Jihar Rivers, bayan da aka ruwaito sun banka wa wani ofishin jam’iyyar African Democratic Congress (ADC) wuta a garinsu.

Lamarin ya faru ne a kan hanyar da ke tsakanin Ubima da Omuanwa a ƙaramar hukumar Ikwerre, yayin da Amaechi ke kan hanyarsa ta zuwa garinsa domin yin rajistar zama mamba a jam’iyyar ADC ta hanyar tsarin lantarki.

Rahotanni sun nuna cewa maharan sun riga sun kafa shingayen hanya domin hana motocin bas da ke ɗauke da magoya bayan jam’iyyar ADC shiga cikin al’ummar. A daren ranar Alhamis kuma, ana zargin ‘yan daban sun ƙona ofishin jam’iyyar na gunduma da ke Ubima kafin isowar tsohon gwamnan.

Shaidun gani da ido sun ce ‘yan bindigar sun buɗe wuta tare da ƙoƙarin tare ayarin motocin Amaechi, lamarin da ya sa jami’an tsaron da ke tare da ayarin suka fafata da maharan a musayar wuta. An ce jami’an tsaron sun fi ƙarfin maharan, wanda daga bisani suka tsere zuwa cikin dazukan da ke kusa.

Har ila yau, harin ya jefa wasu sassan al’ummar cikin fargaba, inda aka ruwaito cewa ƙofar gidan iyalan Amaechi ta cika da ramukan harsasai sakamakon harbin bindigogi da aka yi yayin rikicin.

Da yake jawabi ga magoya bayansa bayan lamarin, Amaechi ya buƙaci ‘yan jam’iyyar da su kwantar da hankalinsu su kuma guji ɗaukar fansa, tare da kira ga hukumomin tsaro da su gudanar da bincike domin kamo waɗanda ke da hannu a harin tare da gurfanar da su gaban shari’a.

Ya kuma yaba wa jami’an tsaro, ciki har da ‘yan sanda, Department of State Services (DSS) da kuma Nigeria Security and Civil Defence Corps (NSCDC), bisa gaggawar da suka yi wajen dakile ƙarin tashin hankali.

Zu zuwa lokacin kammala wannan rahoto, hukumomi ba su sanar da kama kowa ba, yayin da bincike kan harin da kuma ƙone ofishin jam’iyyar ADC ke ci gaba.

Tushe: Vanguard 

— Orbit News 24