𝐃𝐚 ɗ𝐮𝐦𝐢-ɗ𝐮𝐦𝐢: 𝐑𝐢𝐤𝐢𝐜𝐢𝐧 𝐀𝐃𝐂 𝐲𝐚 𝐬𝐚𝐮𝐲𝐚 𝐬𝐚𝐥𝐨, 𝐃𝐚𝐯𝐢𝐝 𝐌𝐚𝐫𝐤 𝐲𝐚 𝐣𝐚𝐧𝐲𝐞, 𝐑𝐚𝐥𝐩𝐡 𝐍𝐰𝐨𝐬𝐮 𝐲𝐚 𝐤𝐚𝐫ɓ𝐢 𝐣𝐚𝐠𝐨𝐫𝐚𝐧𝐜𝐢

Rikicin shugabanci da ke dabaibaye jam’iyyar African Democratic Congress (ADC) ya sake ɗaukar wani sabon salo, bayan samun bayanai cewa tsohon shugaban majalisar dattawa, David Mark, ya janye daga matsayinsa na shugaban rikon ƙwarya na jam’iyyar.

Wannan mataki ya ba damar tsohon shugaban jam’iyyar, Ralph Nwosu, ya sake karɓar ragamar tafiyar da harkokin jam’iyyar, tare da jagorantar shirye-shiryen babban taron ƙasa na ADC.

Rahotanni daga cikin jam’iyyar sun nuna cewa an ɗauki wannan mataki ne domin rage zafin rikicin cikin gida, tare da tabbatar da cewa an gudanar da babban taron cikin tsari da lumana. Haka kuma, ana ganin matakin na da alaƙa da matsin lamba da kuma ƙalubalen shari’a da jam’iyyar ke fuskanta daga hukumar zaɓe ta ƙasa (INEC).

A cewar majiyoyi, Nwosu—wanda a baya ya miƙa shugabanci ga David Mark—yanzu zai jagoranci shirin taron da ake sa ran zai taimaka wajen kawo ƙarshen rikice-rikicen da suka dabaibaye jam’iyyar, musamman a daidai lokacin da ‘yan adawa ke fara shirye-shiryen zaɓen 2027.

Sai dai wannan sauyi ya jawo muhawara a fagen siyasa, inda wasu ke kallon hakan a matsayin wata sabuwar hanya ta warware matsalolin jam’iyyar, yayin da wasu kuma ke ganin zai iya ƙara ruruta rikicin cikin gida.

Tambayar da ke gaban jama’a ita ce: shin wannan canji zai kawo zaman lafiya a ADC, ko kuwa zai haifar da wani sabon rikici?