Kotun Gombe ta daure alkalin kotu shekara biyu da watanni shida kan karɓar cin hanci

Babbar Kotun Jihar Gombe ta yanke wa wani alkalin kotun jihar, Mohammed Suleiman Kumo, hukuncin daurin shekaru biyu da watanni shida a gidan yari bayan samunsa da laifin karɓar cin hanci na Naira miliyan ɗaya.

Hukuncin ya fito ne daga hannun Mai shari’a H.H. Kereng, wanda ya bayyana cewa kotu ta gamsu da hujjoji da shaidu da hukumar Economic and Financial Crimes Commission (EFCC) ta gabatar, wanda suka tabbatar da aikata laifin cin hanci.

Rahotanni sun nuna cewa an fara gurfanar da Kumo a ranar 3 ga Disamba, 2025, bisa tuhume-tuhume uku da suka shafi karɓar cin hanci da kuma amfani da mukaminsa ba bisa ka’ida ba.

A cewar EFCC, binciken da ta gudanar ya nuna cewa wanda ake tuhumar ya karɓi kuɗin Naira miliyan ɗaya daga wani mutum domin yin tasiri ko sauya alkiblar shari’ar da ke gaban kotu, lamarin da ya saba wa dokokin aiki da kuma ka’idojin ɗa’a na bangaren shari’a.

Bayan shafe watanni ana sauraron shari’ar tare da gabatar da shaidu daga bangarorin biyu, kotu ta yanke hukuncin cewa an tabbatar da laifin ba tare da wata shakka ba, tare da yanke masa hukuncin zaman gidan yari na shekaru biyu da watanni shida.

Sai dai kotun ta bai wa Kumo zabin biyan tara ta Naira 250,000, kamar yadda doka ta tanada, maimakon ci gaba da zaman gidan yari idan ya cika sharuddan hukuncin.

Masana harkokin shari’a sun bayyana hukuncin a matsayin wani muhimmin mataki wajen tsaftace bangaren shari’a da kuma tabbatar da cewa babu wanda ya fi karfin doka.

Hukuncin na zuwa ne a lokacin da EFCC da sauran hukumomin yaki da cin hanci a Najeriya ke kara zage damtse wajen hukunta masu aikata laifukan rashawa, musamman wadanda ke rike da mukaman gwamnati ko na shari’a.